Veiligheid Suid-Afrika

Die Veiligheids-Forum is ‘n nie-politieke, nie-regerings instansie wat uit ons eie sakke befonds word en probeer om ‘n positiewe bydrae tot vrede, veiligheid en voorspoed in ons pragtige land te maak. As u enigsins kan bydra, finansieël of andersins, sal dit baie waardeer word. Kontak asseblief die outeur by: plaasveiligheid@hotmail.com

Tuis | Huisveiligheid | Plaasveiligheid | Buurtwagte | Onderhoud | Boeke | Praatjies

Wenke en Diagramme | Gratis Vraelys | Benodigdhede | Kontak

Alhoewel wonings in dorpe en stede gewoonlik naby mekaar geleë is en ook maklik en vinnig deur sekuriteits-reaksiemagte bereik kan word, spring hulle nie die ongekende vlaag van inbrake, wat somtyds met geweld gepaardgaan, vry nie. Dit is dus noodsaaklik dat woonhuise in digbeboude gebiede ook soveel as moontlik voorkomende maatreëls tref om hulle teen inbrekers te verweer. Veral gevalle waar inbrekers in die nag toegang tot wonings verkry en dit leegdra terwyl die huismense vas slaap, kom toenemend voor. Alhoewel verskeie teorieë vir bogenoemde anomalie voorgehou word, die bekendste seker dat een of ander gas in/op huisbewoners gespuit word om hulle aan die slaap te hou, kon nog geen defnitiewe bewys hiervoor gekry word nie. Die gebruik van diesulke middels, gasse en selfs swart toorkuns ("black magic") kan egter nie totaal afgemaak word as slegs 'braaivleispraatjies' nie en moet verder ondersoek word. Of 'n betroubare instansie binne die regeringskringe egter sodanig sal doen en met 'n bevredigende antwoord en/of teenmaatreël vorendag sal kom, is sterk te betwyfel. Dit sal dus vir 'n private en nie-regeringsorganisasie dalk lonend wees om sodanige ondersoek te loods en hopelik meer lig te werp op hierdie nare aspek wat almal van ons se lewens op een of ander manier raak. Intussen rus die onus op iedere en elke eienaar van wonings en woonstelle, om alles in sy/haar vermoeë te doen om die maklike toegang tot diesulke eiendomme te bekamp, te vertraag of selfs in die wiele te ry. Algemene probleme met die teenmiddels soos dit alledaags nog voorkom, is dat dit nie meer voldoen aan die vereistes van die beskermingsvlakke wat benodig word en die gewelddadige inbrake wat ons samelewing "aan gewoond geraak het" nie. Met ander woorde, die ou 10mm diefweringstawe wat gewoonlik net voor oop vensters voorkom, is lankal nie meer voldoende nie en word maklik met 'n staafknipper ("boltcutter") oopgeknip, wat die diewe sommer aan die persoon onder hulle klere met hulle ronddra! Diefwering moet dus toenemend van dikker en sterker staalstawe vervaardig word en ook van panele wat eerder die hele venster en sy raam bedek, as net sekere gedeeltes daarvan. Hou egter in gedagte dat diefwering slegs een element in 'n groot aantal komponente is wat gebruik moet word om kriminele te kortwiek en moet desnieteenstaande, deur ander middele soos veiligheidshekke, alarmstelsels met monitor- en reaksiemagte en dies meer aangevul word. Geen enkele komponent kan meer op sy eie en alleen, genoegsame beskerming of afskrikking verleen nie en daarvan moet die gewone huisbewoner deeglik bewus gemaak word. Modus Operandi: Inbrake

Die eiendom word vir ‘n tyd lank dopgehou. Bewegings van huismense, bediendes en buurtwagte of sekuriteitsmaatskappye (indien enige) word gemonitor en genotuleer. Aanvullende intelligensie word van bediendes en werknemers op die eiendom verkry, hetsy deur noue samewerking en/of die intimidasie van sodanige werkers. Inbrake vind nou veral snags (gewoonlik tussen 24h00 en 04h00) plaas wanneer inwoners vas slaap, omdat daaglikse aktiwiteite sulke inbrake bemoeilik of self in die wiele ry en kriminele makliker in daglig ge-eien kan word. Daar word kort voor die inbraak naby die teiken "uitgekamp" en ‘n laaste verkenning en/of strategie beplan. ‘n Voertuig, gewoonlik ‘n bakkie, word byderhand gehou om die goedere te laai en mee weg te kom. Sekuriteitshekke word met ‘n koevoet, swaar ysterstaaf of soortgelyke gereedskap oopgebreek deur dit naby die slot van die hek in te wurm en dan oop te forseer. Selfs sterk sekuriteitshekke se slotte is nie bestand teen dié metode nie. Oprol-motorhuisdeure word in een van die onderste hoeke geskop sodat dit uit die glygleuf uithak, waarna die inbrekers dan in die motorhuis inkruip. In die woning word die elektriese ware (ketels/mikrogolfoonde/roosters/mengers ens.) buitgemaak, want vinnige geld en afsetplekke is daarvoor gewaarborg. In baie gevalle word vuurhoutjies nalatig getrek om inbrekers se pad te verlig, waarna dit (nog brandend) op die matte/meubels gegooi word. Die yskaste word gestroop van hul inhoud, veral gevriesde vleis om in die inbrekers se "hongersnood" te voorsien. Gewoonlik slaap die inwoners sonder om wakker te word van die lawaai wat deur inbrekers veroorsaak word. Baiekeer word die honde ook nie wakker van die lawaai nie, totdat die inwoners eers geraas maak om inbrekers af te skrik. In die dorpe en op kleinhoewes, gaan die inbrake gewoonlik nie met geweld gepaard as huismense die inbrekers verdryf nie, terwyl plaasbewoners uitsluitlik met geweld gekonfronteer word met/sonder inbrake. Moontlike oplossings: Teen inbrake

Wees altyd waaksaam, veral as u naby ‘n oop erf, bos, plantasie of iets soortgelyks bly, wat goeie obserwasie aan diewe kan bied. Poog om altyd iemand tuis te hê as u bedags by die werk is of met vakansie weggaan. Hou buitehekke, veiligheidshekke en dies meer altyd gesluit. Bring veiligheidshekke binne die huis aan om die slaapvertrekke van die res van die woning af te skei, sou misdadigers suksesvol in u woning inbreek. Versterk die sekuriteitshekke met ekstra slotte aan die bo- en onderkant . Bring ‘n skermplaat gedeeltelik bo-oor die slot aan (of alternatiewelik, ‘n plaat wat die "deur" se volle lengte beskerm) om toegang met ‘n koevoet in die gaping tussen die "deur" en "raam" te verhoed. ‘n Geval is aan die Oos-Rand bekend waar inbrekers die huisbewoners deur die hek gekoggel het na hulle wakker geskrik het. Toe die eienaar van die huis die sekuriteitshek binne-in die woning wou oopsluit om die "ape" uit te sorteer, sou hy die rede vir hulle uittartendheid uitvind: hulle het die slot van die hek verstop en beskadig en was die mense nou gevangenes in hulle eie huis, in hulle eie slaapkamers. ‘n Gebeurlikheidsplan (plan B) moet dus ontwerp en in werking gestel word vir só ‘n geval en enige ander. Indien moontlik, plaas elektroniese sensors aan die buitedeure en sekuriteitshekke wat ‘n groot lawaai kan maak sodra hulle oop geforseer sou word. ‘n Lig wat terselfdertyd met so ‘n alarm afgaan, sal baie doen om kriminele te verdryf. Vra u alarm-maatskappy of ‘n persoon met bietjie elektriese/elektroniese kennis om u behulpsaam te wees en ‘n goeie plan te prakseer. Maak egter seker dat hy die sensors aan die binnekant van die deure/hekke plaas en dat alle bedrading binne-in die metaalhek weggesteek word om kwaadwillige beskadiging deur diewe te voorkom. Bring ekstra sterk en dik Spaanse diefwering voor (veral) u slaapkamervensters en ander belangrike vertrekke aan! Versterk u motorhuis se deur en raam en laat koppel dit op die huis se (of sy eie) alarmstelsel, wat veral in die nag aktief gestel moet wees. Stel u alarmstelsel so, of laat dit her-programmeer om aktief die res van die huis, uitgesluit die slaapvertrekke, te monitor en onmiddelik alarm te maak indien daar ‘n inbraak of selfs net ‘n beweging van buite na binne is. Hou genoegsame brandbestrydingstoerusting binne die huis byderhand indien kriminele ‘n toevallige of opsetlike vuur veroorsaak!